Forcat amerikane kanë kryer ditën e pestë radhazi të sulmeve ndaj objektivave në Iran, duke deklaruar se operacionet synojnë dobësimin e kapaciteteve iraniane për të kërcënuar anijet në Ngushticën e Hormuzit, një nga rrugët më të rëndësishme detare për transportin e naftës në botë.
Sipas mediave shtetërore iraniane, gjatë natës janë dëgjuar shpërthime në disa zona të vendit, përfshirë Bandar Abbas, Ahvaz dhe Chabahar.
Sistemet e mbrojtjes ajrore janë aktivizuar edhe në pjesë të Teheranit, ndërsa raportohen sulme edhe në rajonet qendrore dhe veriore të Iranit.
Ministria iraniane e Shëndetësisë njoftoi se mbi 260 persona janë plagosur nga sulmet e fundit amerikane, shkruan CNN, transmeton Dukagjini.
Ushtria amerikane bëri të ditur se vala e dytë e sulmeve kishte në shënjestër qendra komanduese, sisteme të mbrojtjes ajrore, kapacitete raketore dhe me dronë, si dhe objekte të mbikëqyrjes bregdetare. Më herët, forcat amerikane goditën edhe ishullin strategjik Greater Tunb në Gjirin Persik.
Ndërkohë, sipas burimeve të CNN, presidenti amerikan Donald Trump po shqyrton mundësinë e zgjerimit të operacionit ushtarak. Opsionet përfshijnë marrjen nën kontroll të ishullit Kharg, qendra kryesore e eksporteve iraniane të naftës, si dhe bombardimin e objekteve nëntokësore në Pickaxe Mountain, të cilat besohet se lidhen me programin bërthamor të Iranit.
Nga ana tjetër, Irani ka deklaruar se do t’u përgjigjet “me vendosmëri” sulmeve amerikane dhe nuk planifikon të rikthehet në negociata në këtë fazë. Megjithatë, kryenegociatori iranian ka theksuar se vendi mbetet i hapur për diplomaci, ndërsa vazhdon të mbrojë interesat e tij.
Në zhvillime të tjera, ushtria amerikane njoftoi se ka ndaluar një cisternë nafte pa ngarkesë që po lundronte drejt ishullit Kharg, ndërsa bllokada detare në Ngushticën e Hormuzit vazhdon të kufizojë ndjeshëm trafikun detar.
Presidenti Trump deklaroi gjithashtu se Irani ka liruar shtetasen amerikane Dena Karari, e cila sipas tij mbahej padrejtësisht në paraburgim që prej dhjetorit 2024.