Ushtria amerikane ka rrëzuar disa dronë sulmues iranianë pranë Ngushticës së Hormuzit, njoftoi të premten mbrëma Komanda Qendrore e SHBA-së (CENTCOM).
Sipas CENTCOM-it, Irani kishte lëshuar disa dronë sulmues njëkahësh me qëllim që të pengonte lundrimin e anijeve tregtare në afërsi të kësaj rruge detare strategjike, shkruan CNN, transmeton Dukagjini.
Në një postim në rrjetin social X, ushtria amerikane bëri të ditur se forcat e saj “i kanë rrëzuar të gjithë dronët gjatë orëve të fundit”, ndërsa trafiku detar nëpër ngushticë ka vazhduar pa ndërprerje.
“Koridori ndërkombëtar tregtar mbetet i hapur për transit”, thuhet në deklaratën e CENTCOM-it.
Ngushtica e Hormuzit konsiderohet një nga rrugët më të rëndësishme detare në botë për transportin e naftës dhe gazit, ndërsa çdo tension në këtë zonë monitorohet nga afër nga tregjet dhe fuqitë ndërkombëtare.