Shtetet e Bashkuara kanë insistuar se Ngushtica e Hormuzit mbetet e hapur për trafikun detar, pavarësisht pretendimeve të Iranit se e ka mbyllur këtë rrugë ujore pas përshkallëzimit të ri të luftimeve.
Përplasjet mes SHBA-së dhe Iranit janë intensifikuar sërish këtë javë, pasi ushtria amerikane njoftoi se ka goditur më shumë se 140 objektiva në Iran. Uashingtoni tha se sulmet ishin kundërpërgjigje ndaj goditjes iraniane ndaj një anijeje që po kalonte në Ngushticën e Hormuzit, sipas SHBA-së duke përdorur një itinerar të paautorizuar, raporton BBC.
Irani ka tentuar të rrisë kontrollin mbi këtë korridor strategjik dhe të dielën herët njoftoi se Ngushtica e Hormuzit ishte mbyllur “deri në një njoftim të mëtejshëm”.
Ndërkohë, Garda Revolucionare Islamike e Iranit (IRGC) kreu sulme ndaj bazave amerikane dhe aleatëve të Uashingtonit në rajon. Irani pretendoi se goditi një bazë amerikane në Jordani, ndërsa Emiratet e Bashkuara Arabe, Katari, Kuvajti, Omani dhe Bahrejni njoftuan se kishin reaguar ndaj sulmeve me raketa dhe dronë nga Teherani.
Përshkallëzimi i ri ka vënë në rrezik marrëveshjen e përkohshme të armëpushimit të nënshkruar muajin e kaluar, e cila synonte rihapjen e Ngushticës së Hormuzit dhe arritjen e një fundi të përhershëm të konfliktit.
Presidenti amerikan Donald Trump deklaroi më herët se sulmet iraniane nënkuptonin se armëpushimi kishte përfunduar, ndërsa ministri i Jashtëm iranian Abbas Araghçi akuzoi SHBA-në për shkelje të marrëveshjes. Megjithatë, Trump tha se negociatat do të vazhdojnë dhe ndërmjetësuesit po përpiqen të rikthejnë procesin diplomatik.
Sipas CENTCOM-it, Garda Revolucionare iraniane sulmoi një anije me flamur të Qipros, duke shkaktuar dëme në dhomën e motorëve dhe duke e penguar atë të vazhdonte udhëtimin. Një anëtar i ekuipazhit të anijes “MV GFS Galaxy” rezulton i zhdukur, sipas autoriteteve amerikane.
Operacionet Detare të Tregtisë së Mbretërisë së Bashkuar (UKMTO) njoftuan se ekuipazhi ishte detyruar të braktiste anijen dhe ndodhej në një varkë shpëtimi.
CENTCOM tha se sulmet amerikane në Iran kishin goditur objekte ushtarake, përfshirë sisteme raketore dhe dronësh, rrjete komunikimi dhe pika vëzhgimi bregdetare.
“ShBA-ja është e gatshme të sigurojë lirinë e lundrimit në Ngushticën e Hormuzit”, deklaroi CENTCOM, duke shtuar se Irani nuk ka kontroll mbi këtë rrugë ujore ndërkombëtare.