Shefi i Zyrës së Bashkimit Evropian në Kosovë, Tomas Szunyog, ka dënuar ashpër djegien e veturave me targa RKS të riregjistruara së fundmi në veri të Kosovës.
Ai ka thënë se shkatërrimi i pronës private që ka ndodhur gjatë 2 ditëve të fundit, është bërë me qëllim të frikësimit të popullatës vendase, dhe, sipas tij, është i mjerueshëm, i papranueshëm dhe duhet dënuar nga të gjithë aktorët përkatës.
“Dënojmë ashpër djegien e automjeteve të riregjistruara së fundmi në targa të Kosovës në veri të Kosovës. Shkatërrimi i pronës private që ka ndodhur gjatë 2 ditëve të fundit, me qëllim të frikësimit të popullatës lokale është i mjerueshëm, i papranueshëm dhe duhet dënuar nga të gjithë aktorët përkatës”, ka shkruar ai në rrjetin social Twitter.
Po ashtu, ai u ka bërë thirrje agjencive të zbatimit të ligjit që të identifikojnë dhe të ndjekin me shpejtësi përgjegjësit.
Ndryshe, në dy ditët e fundit në veri janë djegur gjithsej pesë vetura, të cilat ishin të regjistruara me targa RKS.
Blerim Vela, shef i kabinetit të presidentes Vjosa Osmani, ka thënë se në mbrëmjen e së mërkurës, dy vetura të serbëve të Kosovës, të cilat ishin me targa RKS, janë djegur në Zubin Potok.
Ndërsa, të enjten sipas njoftimit të Policisë, tri veturat pronarët e të cilave kanë qenë të nacionalitetit serb, janë djegur në Zveçan, ndërsa dy të tjerat në Mitrovicë të Veriut.
Vela e ka quajtur këtë një fushatë të orkestruar nga Serbia për të krijuar frikë para zgjedhjeve të 23 prillit.