“Me detyrimin e serbëve të Kosovës që të largohen nga institucionet Kosova, Serbia shkeli në mënyrë të njëanshme të gjitha marrëveshjet e Brukselit, për shpërbërjen e strukturave të saj ilegale në Kosovë”.

Kështu ka deklaruar Blerim Vela, shefi i kabinetit të presidentes së Kosovës, Vjosa Osmani, duke shtuar se një frikësim i tillë nuk do të funksionojë.

“Institucionet e Kosovës do të mbeten multietnike dhe përfaqësuese të të gjitha komuniteteve”, ka shtuar ai, në një postim në rrjetin social Twitter.

Po ashtu, ai ka deklaruar se detyrimi i serbëve të Kosovës për t’u larguar, madje edhe përkohësisht, nga institucionet e Kosovës, sipas tij, duket të jetë një përpjekje e presidentit serb, Aleksandër Vuçiq, për të minuar progresin dhe iniciativat e fundit në lidhje me dialogun e lehtësuar nga BE-ja.

“Ai po ndjek paradigmën e Millosheviçit: zjarrvënës ditën, ‘paqebërës’ natën”, ka shkruar tutje ai.

Gjithashtu, ai ka thënë se Serbia është duke i detyruar serbët e Kosovës që ta braktisin punën e tyre në institucionet e Kosovës.

Vela pas bojkotimit të institucioneve nga serbët: Ky akt i ngjan nxitjes së Rusisë në Donbas në vitin 2014