Leotrim Kurteshi, shefi i Urgjencës në Qendrën Kryesore të Mjekësisë Familjare (QKMF) në Gjilan, ka dhënë dorëheqje nga posti i tij, duke e bërë këtë njoftim publik në një postim në Facebook të enjten. Në njoftimin e tij, Kurteshi ka bërë akuza serioze ndaj stafit mjekësor të urgjencës, duke pretenduar se një pacient ka vdekur për shkak të neglizhencës së mjekut që nuk i është përgjigjur thirrjes për ndihmë.
Kurteshi ka njoftuar se dorëheqja e tij vjen si rezultat i skandaleve dhe shkeljeve që, sipas tij, kanë ndodhur në përkujdesjen për pacientët. Ai ka kërkuar që Prokuroria e Shtetit të hetojë me kujdes këto raste, duke i kërkuar institucioneve të përfshira të merren më seriozisht me problemet e ngritura.
Në postimin e tij, Kurteshi ka theksuar disa shkelje të tjera nga ana e stafit mjekësor. Ai ka raportuar se infermierët e Urgjencës janë parë duke pirë kafe në një kafiteri pranë QKMF-së gjatë orarit të punës. Për më tepër, ai ka organizuar një mbledhje për të diskutuar këto shqetësime dhe ka ftuar drejtorin e QKMF-së, zëvendësdrejtoreshën, kryeshefen dhe koordinatoren e cilësisë, por, sipas tij, ata nuk janë paraqitur.