Fatmir Sheholli është deklaruar i pafajshëm për dy veprat penale për të cilat akuzohet, “Spiunazh” dhe “Shantazh”.
Deklarimi i tij është bërë në seancën fillestare që po mbahet ndaj tij.
Ndërkaq, avokati i Shehollit ka thënë se, në pajtim me klientin e tij, kanë vendosur të heqin dorë nga kundërshtimi i aktakuzës dhe t’i mundësojnë gjykatës që të vazhdojë me shqyrtimin gjyqësor të rastit.
“Para 4-5 ditësh kam qenë në Burgun e Sigurisë së Lartë dhe kam vizituar, kemi biseduar edhe sa i përket kundërshtimit të aktakuzës dhe, duke ia shpjeguar se ne kemi të drejtë që të paraqitemi për hedhjen e aktakuzës, i njëjti është pajtuar me mua që në këtë fazë të heqim dorë nga paraqitja për hedhjen e aktakuzës. Duke pasur për bazë kohën e qëndrimit në masën e paraburgimit, pastaj që ka prova të shumta për t’u administruar, ne jemi dakorduar që të tërhiqemi nga e drejta e paraqitjes për hedhjen e aktakuzës. Gjykatës i propozojmë të aprovojë dhe të fillojmë menjëherë me gjykim gjyqësor”, tha avokati Mentor Neziri.
Sheholli po përballet me aktakuzën e Prokurorisë Speciale, e cila thotë se ai ka qenë i rekrutuar nga shërbimi inteligjent serb, BIA, dhe se ka vepruar sipas urdhrave të Bojan Dimiqit.