Bora e parë e këtij viti ka zbardhur bjeshkët e Gjeravicës, duke sjellë pamje të mrekullueshme dimërore në këtë zonë malore. Menjëherë pas reshjeve, Komuna e Junikut ka ndërmarrë veprime të shpejta për të siguruar qarkullim normal në rrugën Junik–Gjeravicë.
Kryetari i Komunës së Junikut, Ruzhdi Shehu, i cili është gjithashtu kandidat për kryetar në zgjedhjet lokale të 12 tetorit, bëri të ditur se ekipet komunale janë mobilizuar menjëherë dhe rruga tashmë është plotësisht e kalueshme.
“Të dashur junikas,
Bora e parë e këtij viti tanimë ka filluar që të mbuloj bjeshkët e Gjeravicës. Komuna e Junikut menjëherë ka mobilizuar ekipet e saj në terren për të pastruar rrugën Junik-Gjeravicë e cila tashmë është e kalueshme plotësisht.
Megjithatë ju bëjmë apel të gjithëve për kujdes të shtuar gjatë vozitjes”, ka shkruar Shehu në Facebook.