Pas publikimit të rezultateve për votat e mërgatës, kandidati për kryetar të Junikut, Ruzhdi Shehu, ka konfirmuar fitoren e tij bindëse.

Në një postim në Facebook, Shehu ka shkruar se LDK ka fituar rreth 62% të votave të diasporës dhe se diferenca përfundimtare me vendin e dytë është rreth 550 vota, duke e tejkaluar kështu “propagandën për 300 vota”.

“Pra edhe statistikisht sot është zhveshur propaganda e “300 votave”, pasi që diferenca jonë me vendin e dytë është rreth 550 vota. Kjo është arsyeja pse kemi qëndruar kaq të qetë përballë shpifjeve dhe ofendimeve, sepse kemi qenë të bindur se e vërteta dhe e drejta do të triumfojnë në fund.  Faleminderit të gjithë junikasve që jetojnë në Junik dhe në mërgatë, për besimin dhe për përkrahjen e tyre kaq të madhe”, ka shkruar Shehu.

Ai ka shtuar se fitorja është arritur me ndershmëri dhe duar të pastra dhe premton të vazhdojë punën për komunitetin.