Një tjetër person ka humbur jetën si pasojë e Etheve të Nilit Perëndimor në Maqedoninë e Veriut, duke e çuar në pesë numrin e viktimave nga kjo sëmundje.
Rastet e virusit kanë shënuar rritje gjatë javëve të fundit, ndërsa autoritetet shëndetësore po vazhdojnë të monitorojnë situatën.
Më herët ishte raportuar për dhjetëra raste të konfirmuara dhe disa pacientë që po trajtoheshin në gjendje të rëndë.
Virusi i Nilit Perëndimor transmetohet kryesisht përmes pickimit të mushkonjave të infektuara. Në shumicën e rasteve infeksioni kalon pa simptoma, por te një pjesë e pacientëve, veçanërisht te të moshuarit dhe personat me probleme të tjera shëndetësore, mund të zhvillohen forma të rënda neuroinvazive.
Autoritetet rekomandojnë marrjen e masave për mbrojtje nga pickimet e mushkonjave, pasi aktualisht nuk ka vaksinë specifike kundër virusit.
Vetëm pak ditë më parë ishte konfirmuar viktima e katërt, një 76-vjeçar që ishte trajtuar për 27 ditë në Klinikën për Sëmundje Infektive në Shkup.