Disa prej shërbimeve të Google, përfshirë platformën YouTube, u përballën me ndërprerje paraditen e së enjtes në Kosovë dhe në disa vende të tjera të Evropës.
Kompania IPKO njoftoi klientët e saj se problemi lidhet me vetë kompaninë Google, e cila po përjeton vështirësi teknike në disa prej shërbimeve të saj.
Asociacioni për Liri të Shprehjes në Turqi, që monitoron qasjen në internet dhe rastet e censurës, bëri të ditur se ndërprerjet kanë nisur rreth orës 10:00.
Ndërkohë, autoritetet turke thanë se kanë kërkuar një raport teknik nga Google për të kuptuar më shumë rreth shkaqeve të kësaj ndërprerjeje.
Deri tani, Google nuk ka dhënë ndonjë reagim zyrtar për shkaqet e ndërprerjes. Nuk dihet nëse bëhet fjalë për probleme teknike të brendshme apo për ndonjë sulm kibernetik.
Kjo ndërprerje ka ndikuar në mënyrë të konsiderueshme në aktivitetet e përditshme të qytetarëve dhe bizneseve që mbështeten te shërbimet e Google për komunikim, punë apo orientim në lëvizje.