Shërbimi Korrektues i Kosovës (ShKK) ka dhënë detaje lidhur me rastin ku një e dyshuar është arrestuar, sepse e njëjta kishte tentuar të fuste substancë të dyshuar narkotike të llojit marihuanë brenda burgut të Dubravës.

Lexo më shumë: Arrestohet një e dyshuar, tentoi të fuste substancë narkotike në burgun e Dubravës

Në njoftimin e ShKK-së thuhet se oficerët korrektues kanë arritur të parandalojnë futjen e kontrabandës brenda kësaj qendre korrektuese.

“Gjatë bastisjes rutinore në sallën e vizitave, stafi për siguri ka zbuluar se në mënyrë të kamufluar permes trupit është tentuar të kontrabandohet substancë e dyshuar narkotike”, ka njoftuar Shërbimi Korrektues i Kosovës.

Në njoftim thuhet se i burgosuri ndaj të cilit ka qenë e dedikuar substanca e dyshuar narkotike është veçuar dhe ndaj tij është iniciuar procedurë disiplinore.

“Vizita është anuluar, ndërsa për rastin është njoftuar edhe policia e Kosovës”, thuhet tutje në njoftim.

Më tej, theksohet se Shërbimi Korrektues i Kosovës mbetet i përkushtuar në luftimin e kontrabandës brenda institucioneve korrektuese.