Në prag të 18-vjetorit të shpalljes së Pavarësisë së Kosovës, Ambasada e Kosovës në Uashington DC ka bërë të ditur se 17 Shkurti është njohur zyrtarisht si Dita e Pavarësisë së Kosovës në kryeqytetin amerikan.
Përmes një postimi më 14 shkurt 2026, ambasada publikoi një letër të nënshkruar nga Muriel Bowser, kryetare e Uashington DC, në të cilën konfirmohet shpallja e 17 Shkurtit si ditë zyrtare për nder të Pavarësisë së Kosovës.
“Faleminderit, Kryetare Bowser, që e njohët zyrtarisht 17 Shkurtin si Ditën e Pavarësisë së Kosovës në Washington, DC”, thuhet në njoftimin e ambasadës, i cili shoqërohet me letrën në gjuhën angleze.
Në dokument theksohet progresi i Kosovës në forcimin e sundimit të ligjit, në mbrojtjen e të drejtave të njeriut dhe në konsolidimin e rolit të saj në arenën ndërkombëtare.
Po ashtu, Bowser vë në pah kontributin e komunitetit shqiptaro-amerikan në jetën kulturore dhe qytetare të Uashington DC, duke e cilësuar atë si pjesë të rëndësishme të diversitetit dhe zhvillimit të qytetit.