Presidenca e Kosovës ka publikuar shpenzimet prej muajit janar deri në qershor të këtij viti, e që raportohet të jenë shpenzuar mbi 86 mijë euro.
Presidentja e Kosovës, Vjosa Osmani, me kabinetin e saj në përbërje prej 19 personash, kanë shpenzuar, gjithsej, në total 75 mijë e 226 euro e 93 cent.
Sipas njoftimit të publikuar nga Presidenca, më së shumti janë shpenzuar për biletat e udhëtimeve zyrtare jashtë vendit, ku gjithsej janë 48 mijë e 968 euro.
Për akomodim gjatë udhëtimeve janë shpenzuar 12 mijë e 658 euro, ndërsa për karburante raportohet të jenë shpenzuar nëntë mijë euro.
Ndërkaq, për një koktej protokollar me rastin e javës së gruas janë shpenzuar një mijë e 58 euro.
Ndërsa administrata, ish-presidentët dhe Këshilli Konsultativ për Komunitete, gjithsej, kanë shpenzuar 10 mijë e 929 euro për tre muaj.
Më së shumti janë shpenzuar për karburante, ku vlera është 7 mijë e 579 euro, ndërsa për dreka dhe darka zyrtare janë shpenzuar, gjithsej, 2 mijë e 977 euro.
