Kanë filluar të shpërndahen protestuesit serbë në komunën e Zubin Potokut.
Siç raporton gazetarja e RTV Dukagjinit, ata janë dëgjuar duke thënë “shihemi nesër”, duke nënkuptuar se protesta mund të vazhdojë edhe ditën tjetër.
Gjatë ditës ka pasur incidente të shkaktuara nga protestuesit, ku janë sulmuar mediat, zyrtarët policorë, si dhe trupat e KFOR-it. Të lënduar nuk ka pasur, kurse dëme materiale po.
Disa veturave u janë thyer xhamat, disave u janë shpuar gomat, kurse pothuajse në të gjitha rastet edhe u janë shkruar grafitë me simbole fashiste.
Ndërkaq, kryetari i Zubin Potokut, Izmir Zeqiri, sot nuk ka dalë në punë. Ai fillimisht është takuar me ambasadorin Jeff Hovenier, dhe pastaj ka shkuar në selinë e PDK-së, ku ka qëndruar aty për një kohë.