Tërmeti që goditi rajonin pranë kufirit të Turqisë dhe Sirisë, tashmë ka marrë jetën e mbi 21 mijë personave. Ky rajon është shtëpi e 13.5 milionë njerëzve.
Ekipet e kërkim-shpëtimit bënë përpjekjet e fundit gjatë natës të së enjtes, për të gjetur të mbijetuar nën rrënojat e ndërtesave të shembura, raporton CNN.
Shifra e re deri më tani përfshin mbi 17 mijë e 600 njerëz të vdekur në Turqi dhe më shumë se 3 mijë e 300 në Siri, tashmë të shkatërruar nga lufta civile.
Gjithashtu, dhjetëra mijëra njerëz u plagosën.
Edhe pse ekspertët thonë se njerëzit mund të mbijetojnë për një javë ose më shumë, shanset për të gjetur të mbijetuar në temperaturat e ulëta, po zbehen.
Ndërsa ekuipazhet e emergjencës dhe të afërmit gërmuan nëpër rrënoja – dhe herë pas here gjenin njerëz të gjallë – fokusi filloi të zhvendosej në prishjen e strukturave të rrezikshme të paqëndrueshme.
Presidenti i Turqisë, Recep Tayyp Erdogan, e quajti tërmetin “fatkeqësia e shekullit”.
Në veriperëndim të Sirisë, gjatë natës, të enjten më 9 shkurt, mbërritën kamionët e parë të OKB-së, të cilët hynë në zonën e kontrolluar nga rebelët nga Turqia, duke nënvizuar vështirësinë për t’u ndihmuar njerëzve atje.
Numri i të vdekurve nga tërmeti me magnitudë 7.8 i së hënës, kaloi numrin e më shumë se 18 mijë 400 të vdekurve nga tërmeti i vitit 2011, i cili shkaktoi një cunami në Fukushima, Japoni, si dhe tërmetin e vitit 1999 pranë kryeqytetit turk, Stambollit, që u mori jetën rreth 18 mijë personave.