Ambasadori gjerman në Kosovë, Jorn Rhode, së fundmi ka përcjellë shqetësimin e tij mbi pezullimin e licencës së biznesit të Klan Kosovës.
Ky i fundit, në një postim në Twitter, thotë se ndajnë shqetësimet me organizatën e ECPMF-së, AGK-së dhe globalfreemedia dhe të tjerëve në lidhje me pezullimin e licencës së Klan Kosovës, të cilin e ka cilësuar si të papritur.
Ai thotë se do ta ndjekë nga afër këtë punë.
“Ne ndajmë shqetësimet e ECPMF, AGK, globalfreemedia dhe të tjerëve për pezullimin e papritur të licencës së biznesit të klankosova_tv dhe do ta ndjekim nga afër. Procedurat e vazhdueshme duhet të jenë të drejta dhe të mos kërcënojnë ngritjen mbresëlënëse të fundit të Kosovës në renditjen globale të lirisë së medias”.
Për pezullimin e certifikatës së biznesit të Klan Kosovës kanë reaguar edhe organizata, siç është edhe Oda Ekonomike Amerikane, ku ata thonë që vendimi i Ministrisë për pezullimin e certifikatës pa arsyetimin e duhur ose pa një proces të rregullt, cenon sundimin e ligjit.