Në plazhin e Shëngjinit, pamjet janë të pazakonta për këtë periudhë të vitit.
Temperaturat tejet të larta dhe moti i kthjellët kanë bërë që shumë qytetarë të përfitojnë nga fundjava për të kaluar disa orë pranë detit.
Disa prej tyre nuk kanë hezituar të hyjnë në ujë, ndërsa të tjerë po shijojnë rrezet e diellit. Vizitorët thonë se është jo fort e zakonshme që në nëntor të gëzosh mot kaq të ngrohtë, por theksojnë se kjo është një mundësi e mirë për t’u shkëputur pak nga rutina.
Sipas tyre, Shëngjini po kthehet gjithnjë e më shumë në një destinacion të preferuar edhe jashtë sezonit veror.
Por, nuk përbën çudi që qytetarët kanë zgjedhur një të diel pranë detit në Shëngjin, pasi ashtu siç u lajmërua, fundjava është me temperatura deri në 5 gradë mbi vlerat mesatare të muajit. Temperaturat arrijnë deri në 26°C, e ndryshe nga tetori, nëntori pritet të jetë një muaj i thatë./tvklan