Shri Lanka u ka bërë thirrje fermerëve të kultivojnë më shumë oriz pasi po përballet me krizën e saj më të rëndë ekonomike në më shumë se 70 vjet.
Ministri i Bujqësisë së vendit ka bërë këtë thirrje, pasi ka thënë se “situata ushqimore e vendit po përkeqësohet”.
Gjithashtu, të martën, qeveria rriti taksat për të ndihmuar në pagimin e blerjeve kritike, duke përfshirë karburantin dhe ushqimin.
Kombi ishull me 22 milionë banorë është goditur rëndë nga pandemia, rritja e çmimeve të energjisë dhe shkurtimet populiste të taksave.
Mungesa kronike e valutës së huaj dhe rritja e inflacionit ka çuar, gjithashtu, në mungesën e ilaçeve, karburanteve dhe sendeve të tjera thelbësore.
Ministrja e Bujqësisë, Mahinda Amaraweera, u ka thënë gazetarëve “është e qartë se situata e ushqimit po përkeqësohet”.
“Ne kërkojmë nga të gjithë fermerët që të hyjnë në arat e tyre në pesë deri në dhjetë ditët e ardhshme dhe të kultivojnë oriz”, ka shtuar ajo.
Zyrtarët e Sri Lankës kanë kërkuar mënyra për të rritur prodhimin e ushqimit, pasi kryeministri Ranil Wickremesinghe ka paralajmëruar për mungesa të rënda ushqimore deri në gusht.
Vendi po aplikon, gjithashtu, për ndihmë nga një bankë ushqimore e Azisë Jugore, e cila ka furnizuar oriz dhe mallra të tjera për vendet në nevojë, ka raportuar gazeta “Financial Times”.
Komisioneri i Ushqimit, Krishnamoorthy i tha gazetës në një intervistë se departamenti i saj “sapo kishte filluar procesin” për t’i kërkuar Shoqatës së Azisë Jugore për Bashkëpunim Rajonal (SAARC) për “ndihmë nga banka ushqimore”.
Krishnamoorthy ka shtuar se Shri Lanka po kërkonte rreth 100,000 tonë metrikë ushqim në formën e donacioneve ose shitjeve të subvencionuara.
SAARC është një grupim prej tetë shtetesh në Azinë Jugore. Ai përfshin Shri Lankën dhe Indinë, e cila po shfaqet si një nga ofruesit më të mëdhenj të ndihmës në Shri Lanka.