Shefat e teknologjisë janë thirrur në Shtëpinë e Bardhë dhe janë këshilluar që ta mbrojnë publikun nga rreziqet e Inteligjencës Artificiale (AI).
Sipas njoftimit të Shtëpisë së Bardhë, Sundar Pichai nga Google, Satya Nadella nga Microsoft dhe Sam Altmann nga OpenAI e kanë “detyrë morale” ta mbrojnë shoqërinë.
Shtëpia e Bardhë e ka bërë të qartë se mund ta rregullojë më tej sektorin.
Produktet e inteligjencës artificiale, si ChatGPT dhe Bard, të vëna në funksion së voni, kanë rrëmbyer imagjinatën e publikut.
Ato u ofrojnë përdoruesve të zakonshëm mundësi për të bashkëvepruar me atë që njihet si “inteligjencë artificiale gjeneruese”, e cila mund të përmbledhë informacione nga burime të shumta brenda sekondave, të shkruajë prezantime, e madje edhe poezi, që tingëllojnë në mënyrë të besueshme, sikur të jenë të shkruara nga njerëz, raporton BBC.
Zbulimet e tyre kanë ngjallur debat të ri mbi rolin e AI në shoqëri, duke ofruar një ilustrim të prekshëm të rreziqeve dhe përfitimeve të mundshme të teknologjisë së re.
Drejtuesve të teknologjisë, të mbledhur në Shtëpinë e Bardhë, u është thënë se u takon firmave “të garantojnë sigurinë e produkteve të tyre”
Ata, po ashtu, janë paralajmëruar se administrata e presidentit Joe Biden është e hapur ndaj rregulloreve dhe legjislacionit të ri për të mbuluar inteligjencën artificiale.
Sam Altmann, shefi ekzekutiv i OpenAi – firmës që qëndron pas ChatGPT-it – u ka thënë gazetarëve se, sa i përket rregullores, udhëheqësit e teknologjisë “kanë ndarë të njëjtin mendim për atë që duhet të ndodhë”. Altmann nuk ka ofruar më shumë detaje.
Zëvendëspresidentja e ShBA-së, Kamala Harris, ka thënë pas takimit se teknologjia “ka potencialin të rrisë në mënyrë dramatike kërcënimet ndaj sigurisë, të cenojë të drejtat civile, privatësinë dhe të gërryejë besimin e publikut në demokraci”.
Sektori privat ka “përgjegjësi etike, morale dhe ligjore për ta garantuar sigurinë e produkteve të tij”, ka deklaruar ajo.
Shtëpia e Bardhë ka njoftuar se ka ndarë 140 milionë dollarë nga Fondacioni Kombëtar i Shkencës për të krijuar shtatë institute të reja kërkimore të inteligjencës artificiale.
Thirrjet që rritja dramatike e inteligjencës artificiale në zhvillim të rregullohet më mirë, kanë ardhur shumë dhe shpejt, si nga politikanët, ashtu edhe nga drejtuesit e teknologjisë.
Ndërkaq, në fillim të kësaj jave, personi që është konsideruar “babai” i inteligjencës artificiale, Geoffrey Hinton, ka lënë punën e tij në Google, duke thënë se është penduar për punën që ka bërë.
Ai ka thënë se disa nga chatbot-et e inteligjencës artificiale janë “mjaft të frikshme”, duke paralajmëruar se ata mund të bëhen më inteligjentë se njerëzit dhe mund të shfrytëzohen nga “aktorë të këqij”.