Një shpërthim i virusit të rrallë hantavirus në anijen turistike MV Hondius ka shkaktuar shqetësim ndërkombëtar, pasi autoritetet konfirmuan se një shtetas amerikan dhe një shtetase franceze kanë rezultuar pozitivë pas kthimit në vendet e tyre.
Sipas autoriteteve shëndetësore në SHBA, edhe një tjetër amerikan që ishte në fluturimin e riatdhesimit ka shfaqur simptoma të lehta, ndërsa të gjithë pasagjerët po mbahen nën vëzhgim mjekësor në kushte të kontrolluara të biosigurisë.
Në Francë, Ministrja e Shëndetësisë konfirmoi se një paciente është në gjendje të rënduar dhe po trajtohet në izolim në Paris, ndërsa janë identifikuar 22 persona kontakt.
Organizata Botërore e Shëndetësisë World Health Organization ka paralajmëruar se situata duhet trajtuar me kujdes, duke rekomanduar izolim 42-ditor për pasagjerët që janë larguar nga anija, raporton BBC.
Megjithatë, autoritetet amerikane të shëndetit publik theksojnë se rreziku i përhapjes së madhe mbetet i ulët dhe se transmetimi nga njeriu në njeri është i rrallë.
Deri tani, tre pasagjerë kanë humbur jetën – një çift holandez dhe një shtetase gjermane – dy prej të cilëve janë konfirmuar si raste të virusit.
Anija u nis nga Argjentina më 1 prill dhe aktualisht ndodhet e ankoruar në Ishujt Kanarie, Spanjë.
Shumë pasagjerë nga vende të ndryshme evropiane dhe SHBA janë riatdhesuar dhe po mbahen nën monitorim, ndërsa hetimet për burimin e shpërthimit vazhdojnë.