Të dielën e 15 janarit, Policia e Kosovës ka njoftuar se Njësitet policore të Stacionit Policor në Suharekë, kanë lokalizuar dhe kanë arrestuar të dyshuarin me inicialet S. A (21-vjeçar), të cilit i është sekuestruar një armë.
“I dyshuari i lartshënuar pas një mosmarrëveshjeje që e kishte pasur për pronë me familjen e tij, ka shkuar afër shtëpisë së viktimës, (babai i tij) dhe ka shtënë me armë zjarri në ajër. Këtë veprim e ka incizuar dhe e ka postuar në rrjetin social, Snap Chat’, dhe të njëjtin ua ka dërguar vëllezërve të tij”, ka njoftuar Policia e Kosovës.
Tutje, thuhet se patrullat policore pasi kanë dalë në vendngjarje, fillimisht e kanë gjetur një fishek në automjetin e të dyshuarit, e më pas kanë arritur ta arrestojnë të dyshuarin.
“Si dhe e kanë gjetur armën e tipit Moris by AIAK Cal. 9 mm , me të cilën, i njëjti dyshohet të ketë shtënë në ajër, po ashtu i kanë gjetur edhe tre fishekë të tjerë”, ka njoftuar tutje Policia e Kosovës.
Mes tjerash, njoftohet se arma dhe katër fishekë të kalibrit 7.65 janë sekuestruar. Ndërsa, në konsultim me prokurorinë e krimeve të rënda, i dyshuari ndalet në mbajtje për 48 orë.