Presidentja e Kosovës, Vjosa Osmani, ka njoftuar se është shtyrë afati për aplikim të njohjes së statusit të viktimës së dhunës seksuale të luftës.
Presidentja përmes një video-mesazhi ka thënë se afati është shtyrë deri më 15 maj të vitit 2025.
“Të nderuara bashkëqytetare e bashkëqytetarë, në përputhje me ligjin Republika e Kosovës ka shtyrë afatin për aplikim të njohjes së statusit të viktimës së dhunës seksuale të luftës deri më 15 maj 2025. Zëri juaj ka rëndësi dhe e vërteta duhet të dëgjohet. Guximi juaj në kërkim të drejtësisë e në zbardhjen e së vërtetës është një dëshmi e shpirtit tuaj të paepur”, thotë presidentja.
Osmani ka ftuar të mbijetuarit që të aplikohet për njohje të statusit të viktimës së dhunës seksuale të luftës.
“Ne qëndrojmë me ju dhe pranë jush në ndjekjen e drejtësisë. Në këtë rrugëtim ju asnjëherë nuk do të jeni vetëm. Prandaj aplikoni për njohjen e statusit të viktimës së dhunës seksuale të luftës”, është shprehur Osmani gjatë videos.