Bashkimi Evropian vendosi të shtyjë Samitin me liderët e Ballkanit Perëndimor për Planin e Rritjes i paraparë të mbahej këtë javë në Shkup, pasi Maqedonia e Veriut është në një javë zie – pas tragjedisë në Koçani.
“Ne po shohim mundësitë për data të reja për organizimin e Samitit së shpejti”, i tha TV Dukagjinit një zëdhënës i bllokut 27-anëtarësh.
Sidoqoftë, dy marrëveshjet e parapara me Komisionin Evropian në kuadër të Planit të Rritjes – për lehtësira dhe për hua – nga të cilat Kosova mund të përfitojë deri në 882 milionë euro nuk janë ratifikuar në Kuvend.
Derisa parakusht për përfitim mbetet ratifikimi, Kosova duhet të pres deri në konstituimin e legjislaturës së re të dalë nga zgjedhjet e 9 shkurtit.
Ky parakusht vlen edhe për qasje në para-dhënien, që në rastin e Kosovës mund shkojë deri në rreth 60 milionë euro.
“Për të nisur reformat, shtetet/vendet mund të kërkojnë deri në 7% para-financim nga totali i shumës së paraparë nën këtë Lehtësim (nga shuma indikative fillestare e financimit në dispozicion për secilin përfitues). Të gjithë përfituesit me Agjenda të Reformave të miratuara e kanë kërkuar këtë. Përfshirë Kosovën” – Komisioni Evropian.
Megjithatë, për pagesat e rregullta për projekte konkrete ka edhe disa muaj kohë.
“Komisioni tani është duke i finalizuar hapat proceduralë, të cilët duhet të mundësojnë lejimin e para-financimit sa më parë të jetë e mundur, më 2025. Pagesat e para të rregullta priten ndërmjet çerekut/tremujorit të dytë dhe të tretë të 2025-tës, pas përmbushjes së kushteve të parapara” – Komisioni Evropian.
Nga totali deri në 882 milionë euro, Kosova mund të përfitojë rreth 250 milionë euro grante dhe pjesën tjetër kredi të leverdishme.
Ndryshe nga Kosova, BE-ja i konfirmoi Dukagjinit se Shqipëria dhe Maqedonia e Veriut janë shumë përpara në përgatitje dhe se para-financimi për to pritet të nis së shpejti.