Seanca e shqyrtimit fillestar për të akuzuarit në rastin e sulmit terrorist në Banjskë të Zveçanit, e cila pritej të zhvillohej këtë të mërkurë në Gjykatën Themelore në Prishtinë, është shtyrë.
Kjo kërkesë u bë nga avokatët mbrojtës të të akuzuarve, të cilët pretenduan se kanë marrë me vonesë provat e aktakuzës në gjuhën serbe dhe se disa as nuk kanë mundur të hapen.
Gjykata pritet të njoftojë për datën e radhës të seancës.
Tre të akuzuarit që ndodhen në paraburgim u sollën në gjykatë nën masa të rrepta sigurie.
Në paraburgim ndodhen Vladimir Toliq, Blagoje Spasojeviq dhe Dushan Maksimoviq, të cilët u arrestuan gjatë sulmit në Banjskë.
Sulmi terrorist ishte organizuar nga një grup serbësh, ku organizator dhe pjesëmarrës ishte ish-nënkryetari i Listës serbe, Milan Radoiçiq, person ky i afërt me presidentin e Serbisë, Aleksandar Vuçiq.
Pak ditë para se të bëhet një vit nga sulmi terrorist, Prokuroria Speciale e Kosovës ka ngritur aktakuzë kundër 45 personave.
Në aktakuzë thuhet se ky grup, përmes përdorimit të dhunës me armatim të rëndë, ka tentuar “ta shkëpusë pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të territorit t’ia bashkojë Republikës së Serbisë”.
Pritet vendimi i Supremes lidhur me gjykimin në mungesë ndaj 42 të akuzuarve tjerë
Siç raporton gazetarja në terren e TV Dukagjinit, Dorentina Thaqi, në fillimin e seancës është veçuar procedura ndaj tre të akuzuarve që janë në paraburgim dhe atyre që nuk janë prezentë. Kjo sipas gjyqtarit Arben Hoti bëhet për të mos prolonguar çështjen.
Derisa paraprakisht në seancën e shqyrtimit fillestarë prokurori Naim Abazi ka thënë se prezenca e 42 personave nuk ka mundur të sigurohet në asnjë fazë të procedurës, dhe ka kërkuar që të njëjtit të gjykohen në mungesë.
Këtë e kanë kundërshtuar avokatët e të akuzuarve, ndërkohë që gjyqtari Arben Hoti ka thënë se do t’i kërkojnë mendim Gjykatës Supreme, se a mund te vazhdohet me gjykimin në mungesë ndaj atyre që nuk kanë arritur të arrestohen.