Seanca fillestare për vrasjen e 23-vjeçarit nga Mirusha e Malishevës, e cila kishte ndodhur vitin e kaluar është shtyrë për datën 23 shkurt të këtij viti.
Gjykata e ka kthyer aktakuzën për plotësim, duke i kërkuar prokurorisë që te qartësoj se për cilat vepra penale akuzohet i pandehuri Y.G
Në aktakuzë thuhet se pesë persona me qëllim hakmarrjen, e kanë privuar nga jeta Fazli Hoxhën, duke e goditur me mjete të forta dhe pastaj duke i shkaktuar plagë vdekjeprurëse me armë zjarri.
Po ashtu, sipas aktakuzës, të pandehurit akuzohen se kishin tentuar t’ia vrisnin edhe vëllezërit e tjerë të viktimës, duke i goditur në vazhdimësi me mjete të forta dhe duke shtënë në drejtim të tyre me armë zjarri.
Sipas aktakuzës, ata kanë kryer veprën penale “Vrasje e rëndë në tentativë”.
“Të pandehurit, N.G., B.G., A.G., B.G dhe A.G., sipas aktakuzës, duke vepruar në bashkëkryerje, e me qellim të hakmarrjes se paskrupullt, kanë privuar nga jeta viktimën F.H., ku fillimisht të ndjerin e sulmojnë dhe e godasin më mjetet të forta dhe më pas e privojnë nga jeta me armë zjarri. Gjithashtu, të pandehurit N.G.,A.G., B.G., A.G. dhe B.G akuzohen se në bashkëkryerje kanë tentuar ta privojnë nga jeta edhe vëllezërit e tjerë të viktimës F.H , duke i goditur në vazhdimësi me mjete të forta dhe duke shtënë me armë zjarri në drejtim të tyre, me qellim të hakmarrjes se paskrupullt, kanë kryer veprën penale ‘Vrasje e rëndë në tentativë’”, thuhet në një pjesë të aktakuzës.
Ngjarja kishte ndodhur më 28 prill të vitit 2022 te “Ujëvara e Mirushës” në aksin rrugor Klinë-Gjakovë.
Pasi e kishin përfunduar iftarin bashkë me familje në një restorant, viktimat u përballën me të dyshuarit në parkingun e restorantit, të cilët kishin gjuajtur me armë dhe kishin qëlluar në dy vëllezërit, por, fatkeqësisht, njëri nga ta (Fazli Hoxha) nuk arriti t’u bëjë ballë plagëve të marra.