Nënkryetari i Listës Serbe, Igor Simiq, ka reaguar pas paralajmërimit të vizitës së kryeministres serbe, Ana Bërnabiq, në Republikën e Kosovës më 5 shtator. Sipas të dytit të Listës serbe ky është një shans i mirë për të pasi kanë mundësi t’i dërgojnë një mesazh.
“Ne do të dërgojmë një mesazh të qartë se besojmë vetëm në shtetin e Serbisë, se është vetëm vendi ynë, se besojmë në presidentin Aleksandar Vuçiq”, ka thënë ai.
Më tej, Simiq ka treguar se e ka në plan t’i kërkojë të para së qeverisë së Serbisë, Ana Bërnabiq, investime në fshatrat serbe në Komunat Veriore të Republikës së Kosovës, në mënyrë që të ketë “jetë për serbët në Kosovë”.
Ai treguar se projektet duhet të vazhdojnë më të njëjtin volum siç kanë qenë në vitet e fundit.
Kryeministrja e Serbisë do të hyjë me letërnjoftim në territorin e Kosovës, ka sqaruar Simiq. Ai ka theksuar se identifikimi do të jetë i njëjtë “sikur të ishte në ndonjë pjesë tjetër të Serbisë”.
Ndërkohë, Simq e ka akuzuar Kryeministrin e Republikës së Kosovës Albin Kurti se ky i fundit “pret që këtu[në Veri të Republikës së Kosovës] të ketë tension, probleme, kaos, e gjitha kjo falë lëvizjeve të tij të njëanshme. Ne jemi të interesuar për paqen dhe ky është mesazhi kryesor i popullit serb”.
Sipas tij, i pari i qeverisë së Kosovës, Kurti, nuk është duke arritur që ta fshehë zemërimin e tij për gjithçka që kryesia shtetërore e Serbisë po bën “për ta stabilizuar situatën në terren”, raporton KosovoOnline, transmeton Portali Dukagjini.