Të enjten e 1 shtatorit, Federata e Sindikatave të Shëndetësisë së Kosovës (FSShK) i ka bërë thirrje Qeverisë së Kosovës, respektivisht, Ministrisë së Financave për ekzekutimin e pagave për punëtorët shëndetësorë.
Sindikatat e shëndetësisë kanë kërkuar që “të mos bëhen lojëra në kurriz të punëtorëve shëndetësorë të cilët janë në shërbim të qytetarëve për 24 orë”.
“Në lidhje me mosmarrjen e pagave të punëtorëve shëndetësorë në kujdesin parësor kërkon nga ana e faktorëve relevantë që punëtorët shëndetësorë sa më parë t’i marrin pagat e tyre njësoj sikurse punëtorët shëndetësorë të kujdesit dytësor dhe tretësor”, thuhet në njoftimin e tyre.
FSShK ka thënë se, pavarësisht konsultimeve që kanë pasur me Ministrinë e Financave dhe zyrtarët komunalë, nuk kanë pasur ndonjë sqarim konkret.
“Vonesa e pagave të punëtorëve shëndetësorë është e papranueshme dhe e dënueshme, andaj kërkojmë që sa më shpejt të ekzekutohen pavarësisht kush është përgjegjës për këtë vonesë”, thuhet tutje.
Ndërkaq, të mërkurën e 31 gushtit, ministri i Financave, Hekuran Murati, ka thënë se ekzekutimi i pagave për këtë muaj është bërë vetëm i pjesshëm, për arsye se sipas tij, organizatat buxhetore nuk i kanë dërguar listat e atyre që kanë dalë në punë me kohë.
Po ashtu, më 25 gusht, Ministria e Financave ka kërkuar nga Këshilli Grevist listën e personave që po marrin pjesë në grevë, për t’ua ndërprerë pagën sipas nenit 18 të Ligjit për Greva.
Ministri Murati ka thënë se përderisa e drejta e grevës dhe grumbullimit është e garantuar me ligj, po ashtu praktikat dhe konventat ndërkombëtare nuk e obligojnë punëdhënësin që të paguajë punëtorin sa është në grevë.
Sipas tij, është obligim i sindikatës që t’i kompensojë grevistët.
Komunat nuk i dorëzojnë listat e grevistëve, Qeveria nuk i proceson pagat për ta