Mbledhja e Këshillit Gjyqësor të Kosovës (KGJK) ka dështuar të mbahet të premten për shkak të mungesës së kuorumit.
Në rend dite ishte paraparë shqyrtimi i kërkesës së ushtrueses së detyrës së Presidentes së Republikës së Kosovës, si dhe njoftimeve të gjyqtarëve dhe stafit administrativ nga komuniteti serb për tërheqjen e dorëheqjeve.
Megjithatë, mbledhja nuk u zhvillua pasi nuk ishte i pranishëm numri i nevojshëm i anëtarëve për vendimmarrje.
Kryesuesi i KGJK-së, Rrustem Thaqi, tha se katër anëtarë e kishin njoftuar paraprakisht se nuk do të merrnin pjesë në mbledhje, ndërsa të tjerë nuk kishin dhënë asnjë njoftim.
“Më kanë informuar se katër prej tyre nuk do të marrin pjesë në takim. Asnjë nga anëtarët nuk ka paraqitur kërkesë për pushim. Nuk mund të lejohet sjellja e tillë. Si pasojë e mungesës së kuorumit, ky takim nuk mund të mbahet”, deklaroi Thaqi.
Çështja e shqyrtimit të kërkesës për tërheqjen e dorëheqjeve të gjyqtarëve dhe stafit administrativ nga komuniteti serb kishte shkaktuar përplasje edhe në mbledhjen e kaluar të KGJK-së, e cila u ndërpre pas debatit ndërmjet anëtarëve lidhur me këtë pikë të rendit të ditës.