Se ka takim me Albin Kurtin e Lëvizjes Vetëvendosjes e mohoi zëshëm e publikisht.

Por në fakt, nga selia e Lidhjes Demokratike të Kosovës, kryetari Lumir Abdixhiku me nguti ishte nisur për në Kuvend.

Aty e priste Kurti, për një takim të dytë, që i bashkon pak orë pas atij që u mbajt një natë më parë, në përpjekje për të gjetur një rrugë drejt formimit të institucioneve.

Për dallim nga takimi i një nate më parë, ky i së mërkurës zgjati dukshëm më pak.

Megjithatë, rezultati mbetet i njëjtë, asnjë marrëveshje.

Kurti e konfirmoi, por para mediave s’doli fare Lumir Abdixhiku.

Si rrjedhojë, detajet e këtij takimi dhe se çfarë u diskutua pas dyerve të mbyllura nuk u bënë publike.

Albin Kurti dhe Lumir Abdixhiku, po zhvillojnë takime kur kanë mbetur vetëm edhe pak orë deri në seancën për konstituimin e Kuvendit e cila është caktuar të enjten në ora 10:00.