Ministrja e Arsimit, Shkencës, Teknologjisë dhe Inovacionit, Arbërie Nagavci, ka pritur në takim përfaqësues të Sindikatës së Bashkuar të Arsimit, Shkencës dhe Kulturës (SBAShK), me të cilët, nuk ka arritur të gjejë një zgjidhje për të filluar procesi mësimor të hënën.
Por, ministrja Nagavci ka bërë kërkesë që procesi mësimor të fillojë nga e hëna , derisa dialogu në mes Ministrisë së Arsimit dhe SBAShK-ut do të vazhdojë.
“Ministrja Nagavci theksoi që secili prej nesh e kemi obligim moral e ligjor të sigurohemi për mirëqenien e fëmijëve dhe garantimin e së drejtës së tyre për arsim. Me këtë rast, ajo kërkoi nga përfaqësuesit e SBASHK, që mësimdhënësit që nga e hëna të fillojnë procesin mësimor ndërkohë që dialogu do të vazhdojë”, thuhet në njoftimin nga MAShTI.
Edhe pse greva është shpallur nga Bashkimi i Sindikatave të Pavarura të Kosovës (BSPK), për 84 mijë zyrtarë publikë, Nagavci ka thënë se pjesa më e madhe e punëtorëve janë në vendet e tyre të punës, ndërsa, ata që po pësojnë nga greva janë rreth 320 mijë nxënës, të cilët kanë mbetur jashtë bankave shkollore.
Ajo i ka informuar përfaqësuesit e SBASHK-ut në lidhje me masat e fundit të Qeverisë për pakon prej 150 milionë eurosh, ku përfshihen edhe mësimdhënësit, si dhe veprimet që i ka ndërmarrë MAShTI sa i përket përmirësimit të kushteve të mësimdhënësve.
Ndërsa, përfaqësues të Sindikatës kanë bërë të ditur edhe një herë se shtesa prej 50 eurosh e ndarë nga Qeveria nuk është e mjaftueshme, dhe sipas tyre duhet të gjendet një zgjidhje për realizimin e kërkesës së tyre për 100 euro.
Nagavci ka deklaruar se MAShTI është për dialog, dhe që sipas saj, Sindikata duhet të reflektojë në arritjen e një marrëveshje duke mos përdorur masa ekstreme.
Ndërkaq, ajo ka shtuar se diskutimet me SBAShK-un do të vazhdojnë sikur deri më tani, dhe duke bërë thirrje edhe një herë, se nga e hëna, të gjithë mësimdhënësit të jenë në shkolla dhe të fillojë procesi i rregullt mësimor.