Kryetari i trupit gjykues në Hagë në rastin ndaj krerëve të Ushtrisë Çlirimtare të Kosovës, Charles Smith, ka deklaruar se procesi gjyqësor nuk ka të bëjë me legjitimitetin e UÇK-së dhe synimin e saj për një Kosovë të pavarur.

Në hapje të seancës, Smith ka thënë se çështja gjyqësore lidhet vetëm me veprimet dhe sjelljen e të akuzuarve, si dhe me faktet dhe rrethanat që lidhen me akuzat ndaj tyre.

“Ka të bëjë me veprimet dhe sjelljen e të akuzuarve. Ka të bëjë vetëm me fakte dhe rrethana që lidhen me akuzat kundër të akuzuarve”, ka deklaruar Smith.

Ai ka theksuar se gjykimi nuk ka të bëjë me vlerësimin e përgjegjësive të palëve në konflikt, as me krimet e kryera nga forcat dhe paramilitarët serbë ndaj shqiptarëve të Kosovës.

“Kjo çështje s’ka të bëjë me legjitimitetin e UÇK-së dhe synimin e saj për një Kosovë të pavarur. Nuk ka të bëjë me vlerësimin e përgjegjësive të njërës palë kundër palës tjetër. Nuk ka të bëjë me krime që forcat dhe paramilitarët serbë kanë kryer kundër shqiptarëve të Kosovës”, ka thënë ai.