Sot e hënë në Bruksel do të mbahet takimi i përbashkët mes ministrave të Punëve të Jashtme të vendeve anëtare të Bashkimit Evropian dhe homologëve të tyre nga gjashtë vendet e Ballkanit Perëndimor.
Ky takim, ku marrin pjesë 27 shefat e diplomacisë evropiane dhe ministrat e jashtëm të rajonit, do të shërbejë si platformë për diskutime mbi zhvillimet aktuale në Ballkanin Perëndimor dhe përgatitjet për samitin BE–Ballkani Perëndimor, i cili pritet të mbahet në qershor në Tivat të Malit të Zi.
Sipas diplomatëve evropianë, në qendër të diskutimeve do të jenë forcimi i bashkëpunimit mes BE-së dhe vendeve të rajonit, rritja e qëndrueshmërisë ndaj ndikimeve të jashtme, si dhe harmonizimi me politikën e jashtme të Bashkimit Evropian, përfshirë sanksionet.
Një nga temat kryesore që Brukseli do të mbajë në fokus mbetet edhe dialogu për normalizimin e marrëdhënieve ndërmjet Kosovës dhe Serbisë. Zyrtarë evropianë kanë shprehur pakënaqësi me dinamikën aktuale të procesit, duke theksuar se ai nuk po ecën me ritmin e dëshiruar.
“Edhe pse ka pasur disa rezultate në muajt e fundit, dialogu ende nuk ka dinamikën e duhur. Presim një shtysë të re për ta avancuar procesin”, ka deklaruar një diplomat evropian, raporton Radio Evropa e Lirë.
Nga ana tjetër, në Bruksel theksohet gatishmëria e përfaqësueses së lartë të BE-së për politikë të jashtme dhe siguri, Kaja Kallas, për të luajtur rol aktiv në procesin e dialogut, përfshirë mundësinë e thirrjes së një takimi të ri në nivel liderësh.
Megjithatë, sipas diplomatëve, situata politike në Kosovë dhe ciklet zgjedhore të vazhdueshme po e vështirësojnë organizimin e një raundi të ri të dialogut në nivelin më të lartë.
Takimi i fundit mes liderëve të Kosovës dhe Serbisë në kuadër të dialogut është mbajtur në shtator të vitit 2023, ndërsa Kaja Kallas, e cila ka marrë detyrën në dhjetor të vitit 2024, ende nuk ka udhëhequr një takim të tillë në nivel liderësh.