Deputeti i Partisë Demokratike të Kosovës (PDK), Nait Hasani, ka shprehur pakënaqësi të madhe ndaj mënyrës se si po zhvillohet vazhdimi i seancës konstituive të Kuvendit të Kosovës, e cila të enjten hyri në ditën e 30-të të saj.
Para nisjes së seancës, Hasani deklaroi se është e paarsyeshme që deputetët të thirren vazhdimisht për të marrë pjesë në një seancë pa progres.
“Cila është arsyeja me na mundu neve me ardhë? Duhet me ardhë prej Prizrenit këtu, me e dëgju atë refrenin për të 30-tën herë edhe me dalë. Kjo është e dëmshme për raportet me ndërkombëtarët, në të cilat po kalon Kosova”, tha Hasani para mediave.
Ai theksoi se ky është një tregues i keq për imazhin e institucioneve dhe përkushtimin e tyre.
“Unë për herë të fundit sot vi. 30 në Librin e Ginisit jemi”, përfundoi me ironi deputeti Hasani, duke iu referuar zvarritjes së seancës si një fenomen që mund të hyjë në librin e rekordeve.