Kreu i Prokurorisë së Posaçme (SPAK), Klodian Braho, ka zhvilluar këtë të hënë një sërë takimesh në Shtetet e Bashkuara të Amerikës me përfaqësues të Departamentit të Drejtësisë, FBI-së dhe DEA-s.
Braho ishte i shoqëruar nga drejtuesi i seksionit kundër Krimit të Organizuar, Vladimir Mara, si dhe drejtuesja e seksionit kundër Korrupsionit, Dorina Bejko.
Në një njoftim në rrjetet sociale, SPAK bëri të ditur se gjatë këtyre takimeve u diskutua forcimi i bashkëpunimit ndërinstitucional në luftën kundër krimit të organizuar ndërkombëtar dhe korrupsionit.
Sipas njoftimit, delegacioni i SPAK u prit nga Zëvendës Ndihmës Prokurori i Përgjithshëm A. Tysen Duva dhe përfaqësues të OPDAT, ndërsa takimet u zhvilluan edhe me ICITAP, FBI dhe DEA, me fokus rritjen e bashkëpunimit dhe koordinimit në përballjen me krimin dhe korrupsionin.