Dhomat e Specializuara të Kosovës kanë konfirmuar se nuk ka asnjë kërkesë publike ose vendim nga ndonjë gjyqtar për lirimin e mundshëm të ish-presidentit Hashim Thaçi për të marrë pjesë në ceremoninë e varrimit të babait të tij në Burojë të Skenderajt.
Sipas Dhomave të Specializuara, të gjitha dokumentet publike, përfshirë parashtrimet nga mbrojtja dhe vendimet e gjykatësve, janë të disponueshme në faqen zyrtare të Gjykatës. Ata theksuan se aktualisht nuk ka asnjë kërkesë ose vendim lidhur me këtë çështje.
“Të gjitha dokumentet publike, përfshirë parashtrimet prej Mbrojtjes si dhe vendimet e gjykatësve, janë të publikuara në faqen e internetit të DHSK-së. Aktualisht, nuk ka asnjë kërkesë apo vendim publik lidhur me këtë çështje. Korniza ligjore e Dhomave të Specializuara të Kosovës u mundëson personave në paraburgim që të bëjnë kërkesa tek gjykatësit kompetent kur ka arsye bindëse humanitare. Deri më tani, DHSK-ja ka menaxhuar 13 vizita nën mbikëqyrje në Kosovë për të paraburgosurit”, kanë thënë për RTK nga DhSK.