Spektakli nisi me këngën e Ilir Shaqirit ‘Yjet e Gjakovës’.
Palestra ‘Shani Nushi’ ushtonte nga brohoritmat e Torcidës dhe Plisave.
Në fund – me trofeun e Kupës së Kosovës për herë të tretë rresht u kurorëzua Trepça.
Fitorja në finale ndaj Prishtinës, me rezultat 71:69, u përjetua me shumë gëzim e emocione të veçanta.
Në mesin e shumë tifozëve ato i përshkroi Drilon Hajrizi.
“Faleminderit shumë prej të gjithë përkrahësve që kanë ardhur prej Mitrovicës. Me të vërtetë po ndihem shumë mirë që kemi arritur t’i shpërblejmë këta njerëz që e kanë bërë gjithë këtë rrugë për neve,” tha ai.
Shumë falënderime për suksesin e Trepçës pati presidenti, Vullnet Sefaja.
“Së pari dua të falënderoj Gjakovën, nikoqirin, Kb Vëllaznimin, për këtë pritje shumë të mirë dhe organizimin shumë të mirë. E dyta kisha pasur dëshirë t’i falënderoj krejt qytetarët e Mitrovicës, e kisha falënderu edhe Torcidën, nuk na ka lënë vetëm në asnjë minutë. Kisha dashur ta shfrytëzoj rastin të falënderoj edhe stafin teknik me në krye trajnerin, Adis Beciragic,” tha Sefaja.
E drejtori sportiv Izet Tahiri s’kishte dyshime se kush është tifozëria më e mirë në Kosovë.
“Torcida është tifogrupi i parë mbarëkombëtar, i cili është themeluar në vitin 1984. Ata janë, kanë qenë dhe do të mbesin numër një për tifozëri në Kosovë,” tha Tahiri.
Për mikrofonin e Dukagjinit folën edhe disa tifozë.
Festa e ‘Xehetarëve’ vazhdoi edhe në qytetin e Mitrovicës deri në orët e vona.