Një statujë e ish-udhëheqësit sovjetik Vladimir Lenin është ngritur në Henichesk të Ukrainës, vend ky i pushtuar tashmë nga Rusia.
Qyteti i Henichesk-ut ndodhet përgjatë detit Azov në provincën Kherson, në veri të kufirit me Krimenë, e cila është e aneksuar nga Rusia.
Tri foto të postuara në rrjetin social Facebook e të verifikuara nga CNN, tregojnë statujën e re të Leninit përpara ndërtesës së këshillit rajonal. Në kulmin e ndërtesës shihet një flamur rus.
Statuja origjinale e Leninit jashtë ndërtesës së qeverisë ishte hequr me urdhër të këshillit të qytetit më 16 korrik 2015.
Henichesk, sipas raportimeve të mediave lokale, ishte një nga qytetet e fundit në rajon që kishte një statujë të Leninit.
Yuri Sobolevsky, deputeti rajonal ukrainas për Kherson, ka konfirmuar praninë e statujës së re në një postim në Facebook.
