Sekretari i Përgjithshëm i NATO-s, Jens Stoltenberg ka thënë se lufta mes Ukrainës dhe Rusisë është një konflikt i cili mund të zgjasë me vite të tëra.
Për një gazetë gjermane, Stolenberg kishte theksuar se furnizimi me armatime i trupave ukrainase do të rriste mundësinë e çlirimit të Donbasit nga trupat rus.
“Ne duhet të përgatitemi për faktin se mund të duhen vite. Nuk duhet të heqim dorë nga mbështetja e Ukrainës”, citohet të ketë thënë Stoltenberg për “Bild am Sonntag”.
Njëherësh, ai ka thënë se ky konflikt është një ndikues në rritjen e çmimeve dhe energjisë.
Në fillim të kësaj jave, Stolenberg ka thënë se një samit i NATO-s në Madrid në fund të këtij muaji pritet të nxjerrë një dakordim për një paketë ndihme për Ukrainën që do të ndihmojë vendin në kalimin nga armatimet e vjetra të epokës sovjetike në pajisjet standarde të NATO-s.
Ukraina u zotua të shtunën se “do të mbizotërojë” kundër Moskës, ndërsa lufton kundër sulmeve ruse pranë një qyteti kyç lindor dhe shumë vende u vunë nën sulm me predha dhe raketa.
Ndryshe, forcat ruse u mundën në një përpjekje për të sulmuar kryeqytetin e Ukrainës, Kiev, në mars. Rusia që atëherë është ripërqendruar në rajonin e Donbasit në pjesën lindore të Ukrainës.
Të premten e 17 qershorit, Komisioni Evropian ka mbështetur Ukrainën dhe Moldavinë që të bëhen kandidate për anëtarësim në BE, transmeton “Euronews“.
Por, liderët e vendeve të BE-së do të thonë fjalën e fundit në një samit në Bruksel më 23 dhe 24 qershor.