Sekretari i Përgjithshëm i NATO-s, Jens Stoltenberg, ka thënë se NATO nuk do të reduktojë mbështetjen e saj për Ukrainën, derisa të arrihet një zgjidhje paqësore.
“Kështu që NATO do të vazhdojë të qëndrojë me Ukrainën për aq kohë sa të duhet. Ne nuk do të tërhiqemi”, ka thënë Stoltenberg.
Një gjë e tillë u bë e ditur në një konferencë për shtyp të premten e 25 nëntorit, shkruan CNN.
Stoltenberg, duke folur në një takim përpara ministrave të jashtëm të NATO-s, ka thënë se shumica e luftrave përfundojnë me negociata, por sipas tij për të arritur në një zgjidhje paqësore duhet të mbështetet Ukraina.
“Shumica e luftërave përfundojnë me negociata.Por ajo që ndodh në tryezën e bisedimeve varet nga ajo që ndodh në fushën e betejës. Prandaj, mënyra më e mirë për të rritur shanset për një zgjidhje paqësore është mbështetja e Ukrainës”, ka thënë Stoltenberg.
Tutje, Stoltenberg ka theksuar se NATO ka ofruar karburant, pajisje mjekësore, pajisje dimërore dhe bllokues të dronëve.
Ai ka thënë se në takimin që do të mbahet në Bukuresht në fund të nëntorit ku do të jenë pjesëmarrës ministrat e jashtëm të NATO-s, do të bëjë thirrje që të ndihmohet Ukraina për të kaluar krizën.