Sekretari i përgjithshëm i NATO-s, Jens Stoltenberg, ka thënë se nuk ka “indikacione” se shpërthimi i raketës në Poloni ishte rezultat i “një sulmi të qëllimshëm”, raporton BBC.
“Nuk ka asnjë indikacion se Rusia po përgatit veprime ushtarake sulmuese kundër NATO-s,” thotë ai.
Këto deklarata Stoltenberg i ka bërë në një konferencë për shtyp pas takimit urgjent të vendeve anëtare të NATO-s, takim i thirrur pas incidentit vdekjeprurës në Poloni.
Ai ka theksuar se hetimet janë duke vazhduar dhe duhet pritur përfundimi.
Po ashtu, ai ka thënë se mbrojtja e NATO-s kundër sulmeve ajrore do të vazhdojë të forcohet si rezultat i këtij incidenti.
“Ne po mobilizojmë mbështetje shtesë,” ka thënë ai, veçanërisht lloje të ndryshme të mbrojtjes ajrore, duke theksuar këtu ndihmën për Ukrainën.
Ndryshe, edhe më herët, presidenti i Polonisë, Andrzej Duda, ka deklaruar se raketa që ra në territorin e tij si pasojë e të cilit mbetën të vdekur dy persona “ndoshta ishte një incident fatkeq”.
“Nuk kishte asnjë bazë për të besuar se incidenti me raketa ishte një sulm”, ka thënë Duda të mërkurën e 16 nëntorit.
Edhe presidenti i Shteteve të Bashkuara të Amerikës, Joe Biden, u tha aleatëve se raketa që vrau dy njerëz në Poloni ishte një raketë e mbrojtjes ajrore ukrainase.
Një raketë e prodhimit rus goditi të martën fshatin polak Przewodowo, që ndodhet në kufirin mes Polonisë dhe Ukrainës, duke vrarë dy persona.