Sekretari i përgjithshëm i NATO-s, Jens Stoltenberg pas takimit me presidentin e Shqipërisë, Bajram Begaj në Bruksel ka thënë se NATO-ja do të ndihmojë në thjeshtimin e dialogut Kosovë-Serbi, teksa theksoi praninë e NATO-s në Kosovë.
Tutje, Stoltenberg u bëri thirrje palëve për kompromis.
“Aleanca e NATO-s ka qenë prezente në Kosovë prej shumë vitesh. Aleatët janë të angazhuar që të vazhdojnë të kontribuojnë vijimësinë e pranisë në Kosovë. Ne punojmë gjithashtu me Bashkimin Evropian në Kosovë. Ne vlerësojmë gjithashtu edhe diskutimet e zhvilluara me ndërmjetësimin e BE-së mes Serbisë dhe Kosovës. Ne mendojmë se kjo është rruga e vetme për stabilitetin në Kosovë. Kemi një mundësi historike që mund të jetë shumë e rëndësishme për të gjithë rajonin. Palët të tregojnë fleksibilitetit dhe gatishmëri për të gjetur një zgjidhje përfundimtare. Pra, NATO-ja është e pranishme në Kosovë dhe ne e marrim shumë seriozisht situatën aty”, ka thënë Stoltenberg.
Ndërkaq, presidenti i Shqipërisë Bajram Begaj ka theksuar se anëtarësimi i Kosovës në NATO është i domosdoshëm, teksa ka thënë se angazhimi i Shqipërisë në NATO do të vijojë të rritet.
“U bë më shumë se një vit që jemi dëshmitarë të një lufte nga agresioni i provokuar i Rusisë. NATO ka demonstruar kohezion, solidaritet. Në këtë kohë sfidash për sigurinë euroatlantike është kryesor përditësimin e planit të mbrojtjes. Anëtarësimi i Suedisë dhe Finlandës janë të mirëpritura. Ne do të jemi për ruajtjen e kohezionit ndërkombëtar për Ukrainën”.
Begaj ka theksuar rëndësinë e aleancës së NATO-s dhe ka deklaruar se zgjerimi i saj është i rëndësishëm sidomos pas agresionit të vazhdueshëm rus.
Begaj po ashtu përmendi që Shqipëria përshëndet dhe mbështet dialogun Serbi-Kosovë.
“Plani evropian për normalizimin e marrëdhënieve është një hap pozitiv që do duhet të qendërzohet në njohjen reciproke ndërmjet dy shteteve. Vlerësoj maksimalisht angazhimin dhe përkushtimin e NATO-s në rajon dhe misionin KFOR, si një histori suksesi dhe garantues i paqes dhe i sigurisë në Kosovë dhe rajon”, ka vijuar ai.