I dërguari i posaçëm i Mbretërisë së Bashkuar për Ballkanin Perëndimor, Lord Stuart Peach, ka thënë se pret një marrëveshje gjithëpërfshirëse, përfundimtare dhe ligjërisht të obligueshme për normalizimin e marrëdhënieve në mes të Kosovës dhe Serbisë.
Ai ka theksuar se u takon liderëve të dy shteteve fqinje që të dakordohen për formatin dhe përmbajtjen e saktë të marrëveshjes në kuadër të procesit të dialogut.
Kështu është shprehur ai gjatë vizitës së tij në Beograd, të mërkurën e 18 janarit, shkruan Danas.
Peach theksoi se më e rëndësishmja është që kjo marrëveshje duhet të jetë e pranueshme për qytetarët e të dyja shteteve, dhe të sjellë përfitim afatgjatë në rajon.
Ndërkaq, presidenti i Serbisë, Aleksandër Vuçiq, pas takimit me të dërguarin e posaçëm të Mbretërisë së Bashkuar për Ballkanin Perëndimor, Lord Stuart Peach, ka bërë të ditur se ka biseduar me të për dialogun Kosovë-Serbi dhe për kërkesën për formimin e Asociacionit të Komunave me Shumicë Serbe.
“Megjithatë, për ne çështja kyçe mbetet formimi i Asociacionit të Komunave me Shumicë Serbe, pasi Kosova ka marrë dhe ka pranuar obligimet në përputhje me marrëveshjet ndërkombëtare, si dhe siguria e popullit serb në Kosovë për të cilën presim mbështetjen e plotë të Mbretërisë së Bashkuar”, ka deklaruar Vuçiq, raporton Novosti.
“Theksova se Serbia si gjithmonë mbetet sinqerisht e përkushtuar për ruajtjen e paqes në rajon, e dëshmuar nga iniciativat e shumta të ndërlidhjes rajonale të drejtuara nga vendi ynë”, ka vijuar Vuçiq.
Ndryshe, emisari britanik ka filluar të martën vizitën e tij në Serbi.
Kjo vizitë e tij në Beograd vjen pas vizitës 12 ditore të tij në Kosovë.
Ndërkaq, i dërguari i posaçëm i BE-së për dialog, Miroslav Lajçak, i shoqëruar nga emisari amerikan për Ballkanin Perëndimor, Gabriel Escobar, pritet që më 20 janar ta vizitojë Kosovën, e më pas edhe Serbinë.