Një gjykatë suedeze ka shpallur fajtore një grua 35 vjeç për krime lufte, pasi kishte postuar fotografi të kokave të prera të ekspozuara në një qytet sirian më 2014.
Fatosh Ibrahim, e cila u deklarua e pafajshme, është dënuar me tre muaj burgim.
Gjykata e Qarkut Goteborg ka thënë se ajo “në dy raste publikoi fotografi të kokave të prera të ngulura në gardhe” të vendosura aty nga militantët e grupit të Shtetit Islamik.
Ibrahimi përdori telefonin e saj për fotografitë në sheshin në Raqqa, ku militantët kishin vendosur trupat dhe kokat e varura.
Gjykata ka deklaruar në vendimin e saj se Ibrahimi postoi në Facebook “komente nënçmuese për njerëzit në foto dhe shprehu se ata e meritonin atë që iu nënshtruan”.
“Gruaja qartë ka shprehur simpati me veprimet e grupit të IS-it dhe veprimet e saj konsiderohen se lidhen me konfliktin e armatosur që po ndodhte në atë kohë”, ka thënë gjykata, ka raportuar AP.
Ibrahimi i ka thënë gjykatës se ajo udhëtoi për në Siri në dhjetor 2012 dhe u detyrua të qëndronte, duke pretenduar se nuk kishte udhëtuar në Siri për t’iu bashkuar grupit të Shtetit Islamik. Ajo u kthye në Suedi në vitin 2017, sipas vendimit.
Ibrahimi është dënuar gjithashtu për kërcënimin dhe shpifjen e punonjësve socialë në Suedi.