Katër persona kanë humbur jetën dhe tetë të tjerë janë plagosur pas një sulmi me armë zjarri në jug të Turqisë, raportojnë mediat lokale turke.
Ngjarja ndodhi në rrethin Tarsus, në provincën Mersin, ku një person i armatosur dyshohet se hapi zjarr fillimisht brenda një restoranti.
Sipas raportimeve të mediave turke, dy nga viktimat në restorant janë pronari i lokalit dhe një punonjës. I dyshuari më pas u largua me automjet dhe vazhdoi të qëllonte edhe në zona të tjera, ku mbetën të vrarë një bari dhe një shofer kamioni.
Policia turke ka nisur një operacion të gjerë për kapjen e autorit, me përfshirjen edhe të helikopterëve në kërkim.
Autoritetet ende nuk kanë bërë publike identitetin apo motivin e sulmit.