Heathrow është mes disa aeroporteve evropiane që u prekën nga një sulm kibernetik, i cili ka dëmtuar sistemet elektronike të regjistrimit dhe bagazheve. Aeroporti paralajmëroi për vonesa për shkak të një “problemi teknik” që lidhet me softuerin e kompanisë Collins Aerospace, i përdorur nga disa linja ajrore.
Aeroporti i Brukselit raportoi se pasagjerët u desh të regjistroheshin dhe të hipnin në avion manualisht, ndërsa Aeroporti Brandenburg në Berlin sinjalizoi kohë pritjeje më të gjata. Edhe Aeroporti i Dublinit dhe ai i Cork-ut konfirmuan një “ndikim të vogël”, me disa linja që kaluan në regjistrim manual.
RTX, kompania që zotëron Collins Aerospace, tha se është në dijeni të një ndërprerjeje të lidhur me sigurinë kibernetike në disa aeroporte dhe po punon për ta zgjidhur sa më shpejt. Sipas saj, sulmi ka prekur softuerin Muse, i cili u mundëson linjave të ndajnë sportelet dhe portat në një aeroport. Kompania sqaroi se ndikimi është i kufizuar vetëm në regjistrimin elektronik dhe dorëzimin e bagazheve, ndërsa procesi mund të kryhet manualisht.
BBC raportoi se British Airways po operon normalisht falë një sistemi rezervë, por shumica e linjave të tjera që operojnë nga Heathrow u prekën rëndë. Sipas FlightAware, qindra fluturime u vonuan gjatë së shtunës.
Pasagjerët raportuan probleme serioze. Lucy Spencer tha se priti mbi dy orë në radhë për një fluturim të Malaysia Airlines, ndërsa stafi regjistronte manualisht bagazhet. Një tjetër pasagjere, Monazza Aslam, tha se kishte qëndruar mbi një orë në avion pa asnjë informacion për nisjen, duke humbur lidhjen e fluturimit në Doha. “Jam në Heathrow me prindërit e mi të moshuar që nga ora 05:00. Jemi të uritur dhe të lodhur,” shtoi ajo.