Të paktën katër persona kanë humbur jetën në një valë të madhe sulmesh me dronë që Ukraina ka ndërmarrë ndaj Rusisë, përfshirë edhe rajonin e Moskës.
Sipas autoriteteve ruse, gjatë natës Ukraina lëshoi afro 600 dronë drejt 14 rajoneve ruse, si dhe ndaj Gadishullit të Krimesë dhe zonave të Detit të Zi e Azov.
Tre persona u vranë në rajonin e Moskës, ndërsa një tjetër në rajonin e Belgorodit. Ministria ruse e Mbrojtjes tha se mbrojtja ajrore rrëzoi 556 dronë gjatë natës dhe neutralizoi edhe 30 të tjerë pas agimit.
Guvernatori i rajonit të Moskës, Andrei Vorobyov, deklaroi se një grua humbi jetën pasi një shtëpi u godit në Khimki, në veri të kryeqytetit rus. Ai shtoi se ekipet e shpëtimit po kërkojnë ende për një person tjetër nën rrënoja.
Sipas tij, dy burra të tjerë u vranë në fshatin Pogorelki, rreth 10 kilometra larg Moskës, pasi mbetjet e një droni ranë mbi një kantier ndërtimi. Disa ndërtesa banimi dhe objekte infrastrukturore janë dëmtuar, raporton The Guardian.
Kryetari i Moskës, Sergei Sobyanin, tha se sistemet e mbrojtjes ajrore kanë rrëzuar mbi 80 dronë mbi kryeqytet. Ai njoftoi se 12 persona janë plagosur dhe janë regjistruar dëme të vogla nga rënia e mbetjeve të dronëve.
Një nga sulmet goditi një zonë pranë rafinerisë së naftës dhe gazit në Moskë, duke plagosur punëtorë ndërtimi dhe dëmtuar tri shtëpi, por autoritetet thanë se prodhimi në rafineri nuk është ndërprerë.
Ndërkohë, aeroporti më i madh i Rusisë, Sheremetyevo, bëri të ditur se mbetje të dronëve ranë brenda perimetrit të aeroportit, por pa shkaktuar dëme.
Presidenti ukrainas, Volodymyr Zelenskyy, kishte paralajmëruar javën e kaluar se Ukraina do të shtonte sulmet me dronë si kundërpërgjigje ndaj bombardimeve ruse në Ukrainë, ku u vranë mbi 20 persona dhe u plagosën rreth 50 të tjerë.
Mbi 550 dronë ukrainas ndaj Moskës, tre të vrarë në kryeqytetin rus