Një burrë ka sulmuar me thikë tre gra në tre stacione të ndryshme të metrosë së Parisit të premten pasdite, ndërsa i dyshuari është arrestuar pak më vonë, kanë njoftuar autoritetet franceze.
Sipas prokurorisë, sulmet ndodhën rreth orës 16:00 në linjën 3 të metrosë, fillimisht në stacionin République, më pas në Arts et Métiers dhe së fundi në Opéra, shkruan Euronews, transmeton Dukagjini.
Të treja viktimat u trajtuan nga ekipet mjekësore dhe ndodhen jashtë rrezikut për jetën.
I dyshuari u identifikua dhe u lokalizua përmes pamjeve të kamerave të sigurisë (CCTV) dhe të dhënave të gjeolokacionit nga telefoni i tij mobil, pas çka u arrestua në rajonin e Parisit.
Operatori i transportit publik të Parisit, RATP, bëri të ditur se zjarrfikësit dhe policia ndërhynë menjëherë, ndërsa ekipet e sigurisë u dislokuan për të forcuar masat e sigurisë në linjën e metrosë ku ndodhën sulmet. Hetimet për motivet e sulmit janë duke vazhduar.