Disa persona kanë mbetur të plagosur me thikë nga një person në stacionin e trenit Gare du Nord në Paris mëngjesin e së mërkurës.
Kështu ka bërë të ditur ministri i Brendshëm, Gerald Darmanin, përmes një postimi në llogarinë e tij, në Twitter.
Ai ka thënë se sulmuesi është “neutralizuar shpejt” nga policia.
Un individu a blessé plusieurs personnes ce matin à la Gare du Nord. Il a rapidement été neutralisé. Merci aux forces de l’ordre pour leur réaction efficace et courageuse.
— Gérald DARMANIN (@GDarmanin) January 11, 2023
Sipas raportimeve mediale, sulmi ndodhi në orën 06:40 brenda stacionit të trenit.
Policia thuhet se ka arritur të arrestojë sulmuesin dhe e ka plagosur para arrestimit, ndërsa ambulanca ka ndërhyrë dhe ka ofruar ndihmë për të lënduarit.
Për momentin nuk dihen motivet e sulmit, ndërsa kompania ka thënë se së shpejti duhet të normalizohet qarkullimi në këtë pjesë.
Stacioni ku raportohet se ka ndodhur sulmi është një prej stacioneve më të frekuentuara në Evropë dhe është një linjë e rëndësishme që lidh Parisin, Londrën dhe veriun e Evropës.
Policia ka rrethuar vendin e ngjarjes dhe se trenat janë duke operuar normalisht, raportoi Franceinfo.
Ndërkaq, televizioni BFM tha se policia ka përdorur armë zjarri për të ndaluar personin e dyshuar.