Rusia ka goditur për të dytën ditë radhazi një urë që lidh dy pjesët e kryeqytetit ukrainas, Kievit, duke shkaktuar ndërprerje të trafikut dhe vështirësi në lëvizjen e banorëve.
Sulmi me dron ndaj Urës Jugore, e cila aktualisht është e mbyllur, ishte i fundit në një seri sulmesh që nga e enjtja. Si pasojë, trafiku në këtë urë dhe në dy ura të tjera mbi lumin Dnipro është pezulluar plotësisht ose pjesërisht.
Sulmet e njëpasnjëshme ruse me dronë kanë shkaktuar kolona të gjata trafiku në Kiev, ndërsa banorët po përpiqen të përshtaten me sulmet pothuajse të vazhdueshme ndaj kryeqytetit.
“Ne nuk e dimë se çfarë po mendojnë rusët atje, apo çfarë do të bëjnë më pas. Askush nuk e di se çfarë do të ndodhë të hënën”, tha për Reuters 51-vjeçarja Larysa, e cila po udhëtonte me autobus në qytet.
Para sulmit të fundit ndaj urës, kryetari i Kievit, Vitali Klitschko, mblodhi këshillin e sigurisë së qytetit për të vlerësuar situatën. Ai e përshkroi gjendjen në kryeqytet si “shumë dramatike”.
Mbi një e treta e rreth 3 milionë banorëve të Kievit jetonin në pjesën lindore, ose në të ashtuquajturën “bregu i majtë” i Dnipros, para pushtimit rus të vitit 2022. Megjithatë, shumica e tyre punojnë në pjesën perëndimore të qytetit, në “bregun e djathtë”, ku ndodhen shumica e institucioneve shtetërore dhe kompanive.
Ndërkohë, gjatë së premtes, një person u vra dhe dy të tjerë u plagosën nga një sulm me dron rus, i cili shkaktoi zjarr në katet e sipërme të një ndërtese banimi, thanë zyrtarët ukrainas.
Në qytetin verilindor të Kharkivit, qyteti i dytë më i madh i Ukrainës, dy persona u vranë dhe 32 të tjerë u plagosën nga një sulm me bombë të drejtuar, sipas guvernatorit rajonal.